“Palët janë në kërkim të akordit financiar. Gjasat janë që Mavraj të më bashkohet mua në Greqi”. Kështu paralajmëroi para dy ditësh Migjen Basha, mesfushori ynë kuqezi, i pyetur mbi mundësinë që Mërgim Mavraj të bëhej pjesë e Arisit të Selanikut, ku edhe ai u transrferua kësaj vere. Kjo gjë është zyrtarizuar pikërisht ditën e sotme, çka konfirmohet nga mediat greke.

Qendërmbrojtësi i kombëtares shqiptare ka firmosur kontratë 2-vjeçare me klubin helen. Ja si shkruan “thessports.gr”: “Aris e vuri “qershinë mbi tortë”, sa iu përket përforcimeve të kësaj vere, duke siguruar marrëveshje me Mërgim Mavraj, i cili do të forcojë qendrën e mbrojtjes së verdhezinjve.

32-vjeçari është larguar së fundi nga Hamburgu, pasi luajti 18 ndeshje sezonin e kaluar me të. Ai ka veshur edhe fanellën e klubeve të tilla si Këln, Greuther Furth, Bochum dhe Darmstadt. Mavraj është lojtar i ekipit kombëtar të Shqipërisë që nga viti 2012, me 43 paraqitje dhe 3 gola, bashkë me shokun e ekipit të tij të ri tashmë, Migjen Basha”.